Болҕомто, истиҥ сыһыан бэлиэтэ

Бу күннэргэ Эдьигээн оройуонугар инбэлииттэр декадалара анал бырагырааманан үрдүк тэрээһиннээхтик ыытылла турар. Манна олох араас охсууларыттан, ыарахан ыарыы содулуттан инбэлиит буолар уустук дьылаҕаламмыт дьон түмсэн күрэхтэһиигэ, куонкуруска кытталлар. Биир оннук тэрээһининэн спорт үс көрүҥүн хабан ыытыллыбыт спартакиада буолла. Уопсай түмүккэ дуобакка эр дьон ортотугар А.Ларионов, Д. Андреев, В.Никифоров, дьахталларга Л.Ильинова, М.Андреева, О.Бердюгина, оҕолорго Коля Саввинов, Арлетта Михайлова, Велена Винокурова кыайыылаахтарынан таҕыстылар. Дартска эр дьоҥҥо А.Рудых, И.Антонов, В.Ибрагимов, дьахталларга Я.Андреева, М.Андреева, А.Лазарева, оҕолорго Лаврентий Ильинов, Вика Элляева, Валерия Фомина тэҥнээхтэрин булбатылар. Сыал ытыыга эр дьоҥҥо А. Никитин, Д.Андреев, Д.Семенов, дьахталларга Я.Андреева, Л.Ильинова, А.Сергеева, оҕолорго Коля Саввинов, Валерия Фомина, Вика Элляева бастыҥнарынан ааттаннылар. “Көрдөөх стартка” кыттыбыт хамаандаларга “Хлебпекарня” тэрилтэ минньигэс тортары спонсордаан үөрүүлээх быһыыга-майгыга туттардылар. — Спартакиаданы сэргэ, эбээлэргэ аналлаах “А ну-ка, бабушки!” куонкурус эмиэ өрө көтөҕүллүүлээхтик буолла. Итиэннэ доруобуйаларынан хааччахтаах оҕолору мунньан, оройуон тэрилтэлэригэр экскурсияҕа сырытыннардыбыт. Оҕолор бэкээринэҕэ сылдьан килиэп хайдах оҥоһулларын көрдүлэр. Баһаарынай чаас, оройуоннааҕы бибилэтиэкэ үлэлэрин билистилэр. Оройуоннааҕы история музейын улаханнык сэҥээрдилэр. Бу декада болҕомто, истиҥ сыһыан бэлиэтинэн буолар. Тэрээһиммин биллэн туран, манан эрэ муҥурдаммат, — диэн кэпсиир инбэлииттэр уопсастыбаларын салайар Айталина Михайлова. Декаданы түмүктүүр тэрээһин ахсынньы 10 күнүгэр буолуоҕа. Бу күн оройуон олохтоохторугар анаан үтүө санааланыы кэнсиэрин көрдөрүөхтэрэ. Киирбит үп кырачаан Милана Антонова эмтэнэригэр барыаҕа.