Эдьигээннэр үбүлүөйгэ бүттүүн кытталлар

Үбүлүөйдээх сылга Эдьигээн олохтоохторо, урбаанньыттар кырдьаҕас дойдуларын историятын, олоҕун, уратытын көрдөрөр эҥинэ бэйэлээх кэрэ-мааны оҥоһуктары оҥорор, атыылыыр толору кыахтаахтар. Урбаанньыт Людмила Слепцова Эдьигээн туһунан хаартыскалары аһы-үөлү бэлэмнииргэ туттуллар дуоскаларга түһэртээн хаһаайкаларга, улуус олохтоохторугар, бу ураты айылҕалаах сиргэ-уокка ыалдьыттаабыт дьоҥҥо соһуччу үөрүүнү бэлэхтээтэ. Көрбүт эрэ сөҕөр, хайгыыр, сонурҕатар бэртээхэй оҥоһуктары «Чараҥ» маҕаһыыныгар атыыга таһаарда. — Оҥоһуктарга Ольга Петрова уонна бэйэм түһэрбит хаартыскаларбын туһанным. Сотору кэминэн Эдьигээммитин көрдөрөр ойуулаах чааскылары атыыга таһаараары бэлэмниибит. Үбүлүөй диэн барыбыт бырааґынньыкпыт. Онон бу улахан долгутуулаах уонна күүтүүлээх тэрээһин үрдүк таһымнаахтык барарыгар ким тугу сатыырынан тус кылааппытын киллэрэргэ кыһаллабыт, — диэн санаатын үллэһиннэ. Онтон Альбина Саввинова тирииттэн, түүттэн, сылгы сиэлиттэн аттаран, кыбытыктаан тикпит киэргэллэрин дьон-сэргэ хамаҕатык атыылаһар. — Альбина хас биирдии үлэтигэр Эдьигээни санатар араас киэргэтиилэри туттубута болҕомтону тардар. Дьон бэлэххэ-таһыхха диэн үөрэ-көтө атыылаһаллар, — дииллэр маҕаһыын атыыһыттара.