Премьер-лига
Футбол
Хоккей
Матч-центр
Бокс
MMA
Автоспорт
Теннис
Баскетбол

Өлөөннөр уонна намнар доҕордоһуу муостатын туттулар

Өрөспүүбүлүкэҕэ быйыл государственнай уонна общественнай диэйэтэл, норуотун дьылҕатын көмүскээбит сүдү үтүөлээх, Эҥсиэли хомпоруун хотойо Илья Егорович Винокуров төрөөбүтэ 120 сыллаах үбүлүөйүн үөрүүлээхтик бэлиэтээтилэр. Бу күннэргэ Нам улууһуттан биир дойдулаахтарын сырдык аатын үйэтитэр, ыччат дьоннуун сибээс олохтуур сыаллаах улуустааҕы ыччат политикатын управлениетын көҕүлээһининэн делегация кэлэн ыалдьыттаата. Ол курдук М.Аммосов аатынан СӨ государственноһын историятын музейын наукаҕа сотруднига Станислав Дьяконов, «Ылдьаа ыччаттара» общественнай тэриллии чилиэнэ , «Көбөкөн нэһилиэгэ» МТ дьаһалтатын исписэлииһэ оройуон баһылыгын Александр Иванову кытта көрүстүлэр. «Уһулуччулаах государственнай политическай деятель И.Е.Винокуров» диэн төгүрүк остуолга кытыннылар. Станислав Дьяконов политическай диэйэтэл олоҕун, ыарахан кэмҥэ өрөспүүбүлүкэни салайан олорбутун, Булуҥ, Өлөөн оройуоннарын төрүттээбитин, «Башарин дьыалата» биллэр учуонай, үс классик суруйааччылар үтүө ааттарын тиһэҕэр тиийэ көмүскэспитин, Саха государственнай университетын төрүттэспитин, саха сиригэр түбүркүлүөһү утары охсуһууга анал балыыһалар аһыллалларын ситиспитин, промышленность саҥа сайдыытын саҕахтарын киллэрбитин о.д.а. оҥорбут үтүө дьыалаларын слайданан кэпсээн болҕомтону улаханнык тарта. Оттон Галина Гаврильевна «Ылдьаа ыччаттара» оҕо хамсааһынын акцияларын, бырайыактарга, куонкурустарга кытталларын, бу хамсааһыҥҥа оҕолор Илья Винокуров олоҕун, үлэтин-хамнаһын үөрэтэн эрэ баран улахан коункуруһу ааһан киирэллэрин кэпсээтэ. Быйыл актыбыыстар Илья Егорович Бүлүү улууһугар олорбут дьиэтигэр сылдьан, элбэх матырыйаалы хомуйан кэлбиттэр.
Өлөөннөр уонна намнар доҕордоһуу муостатын туттулар
Фото: ЯСИА.RUЯСИА.RU
Бу кэннэ СӨ государственность музейын сотрудниктара архыыпка олоҕуран оҥорбут «Защитник судьбы своего народа» диэн автобиографическай документальнай киинэни болҕомтолоохтук көрдүбүт. Маныаха харда тылы нэһилиэк дьаһалтатын исписэлииһэ Христофор Васильев Өлөөҥҥө Илья Винокуровы чиэстиирбитин, кэриэстиирбитин, киниэхэ аналлаах тэрээһиннэр, оҕолорго конференция, о.д.а. тэрээһиннэр үрдүк таһымҥа ааспыттарын билиһиннэрдэ.
Делегация салгыы этнография музейыгар, «Сардаҥа» хаһыат редакциятыгар, олохтоох «Өлөөн» телевидениетигэр, орто оскуолаҕа, оройуоммут кэрэ-бэлиэ сирдэригэр сырыттылар. Оройуон актыыбын кытта санааларын атастастылар, хаартыскаҕа түстүлэр. Көрсүһүүгэ «Сугулаан» оройуоннааҕы депутаттар Сэбиэттэрин бэрэссэдээтэлэ Зоя Григорьева намнар сибээстэһэ кэлбиттэригэр махтанна. Нам улууһун Харыйалааҕа уонна биһиги Харыйалаахпыт олохтоохторо билсэн, үлэҕэ-хамнаска үөрүйэхтэрин атастаһаллара буоллар диэн баҕа санаатын эттэ. Биир ситимнээх икки оройуон доҕордуу сибээстэрэ ыччаттарынан салҕанара итиэннэ эһиил ыччат сыла үүнээри турарынан бу айан үйэлээх буоларыгар бастакы хардыы оҥоһуллубутун киэн туттан, үөрэн бэлиэтээтэ.