Муома оройуона төрүттэммитэ 85 сылынан ыытыллыбыт тэрээһиннэр чэрчилэринэн, «Уоланнар ыллыыллар» бэртээхэй куонкурус буолбут. Бу туһунан, дойдутугар ыалдьыттыы сылдьар, Мэҥэ-Хаҥалас улууһунааҕы «Таммахтар» литературнай холбоһук айар түмсүүтүн салайар Августина Хабарова иһитиннэрдэ.
-Кэнчээри ыччаты кэрэҕэ угуйар, сирдиир сыаллаах-соруктаах бэртээхэй куонкурустар ыытыллаллар. Олортон биирдэстэринэн Муома орто оскуолатын бырайыагынан «Уоланнар ыллыыллар» диэн улуустааҕы ырыа куонкуруһа буолар. Бу тэрээһин улахан болҕомтону тарта. Күүтүүлээх дьоро киэһэ сыанаҕа уолаттар, эдэр ыччат тахсыбыта ураты кэрэ буолла. Дурда-хахха буолар кэнчээрилэрбит кэрэ куоластарынан, иэйиилээхтик ыллыылларынан, сыанаҕа туттан-хаптан көстүүлэрэ да үчүгэйинэн көрөөччүлэри улаханнык долгуттулар, астыннардылар, үөртүлэр. Түмүккэ, Гран-при үрдүк аатын Индигир орто оскуолатын уоланнара (салайааччы Василий Слепцов) ыланнар көрөөччүлэр эҕэрдэлэрин туттулар.
Маны сэргэ, «Тэтим» ыччат үҥкүү ансаамбыла бэртээхэй кэнсиэри бэлэхтээтэ. Любовь Федорова салайар ансаамбылыгар Хонуу бөһүөлэгэр олорор, үлэлиир ыччаттар сылдьаллар. Кинилэр үлэлэрин кэннэ мустан дьарыктаналлар, сонун үҥкүүлэри туруораллар. Итиэннэ хас бырааһынньык аайы бэртээхэй үҥкүүлэринэн дойдулаахтарын үөрдэллэр. Онон дьоро киэһэ «тэтимнэр» тэтимнээх үҥкүүлэригэр олорон, аан дойдуну эргийэн кэлбит курдук сананныбыт. Бу киэһэни эдэр ырыаһыттар Мария Старкова, Василий Аммосов, Юрий Ильин уонна Дьокуускай куораттан ыҥырыллан кэлбит кэскиллээх эдэр ырыаһыт Юлиан Семенов (урукку өттүгэр Муомалар куттарын туппут Никифор Семенов уола) киэргэттилэр. Үөрүүлээх истиҥ киэһэҕэ мустубут көрөөччүлэр өргө диэри оҕолорун ытыстарын тыаһынан арыаллаатылар. Кэнчээри ыччаттарыгар, оскуола кэллэктиибигэр махталларын тиэртилэр, маннык тэрээһиннэр тиһиктээхтик салҕаналларыгар баҕардылар.