Лидия Андреева мусуойа
Сунтаардар киэн туттар киһибит, Арассыыйа спордун үтүөлээх маастара, кикбоксиҥҥа Аан дойду 6 төгүллээх чемпиона, Аан дойду кубогын 7 төгүллээх кыайыылааҕа, боксаҕа, кикбоксиҥҥа Арассыыйа 16 төгүллээх чемпиона, боксаҕа Аан дойду чемпионатын 3-с призера, профессиональнай боксаҕа Европа чемпиона, «Женщины Мира» анал бэлиэ хаһаайката, Сунтаар улууһун Бочуоттаах гражданина Лидия Андреева мусуойа үөрүүлээх быһыыга-майгыга аһылынна. Бу дьиэҕэ Лидия олорбута. Мусуойу кини төрөппүттэрэ Аграфена Степановна, Егор Ефимович көҕүлээн тэрийдилэр. Лидия Андреева 1982 сыллаахха Сунтаар нэһилиэгэр күн сирин көрбүтэ. Кыра эрдэҕиттэн олус бойобуой этэ. Ийэтигэр «улааттахпына боксер, байыас буолуом» диэн этэр эбит. Ол баҕа санаатын толорон, оскуолаҕа үөрэнэ сылдьан, Сунтаартан бастакы Арассыыйа үтүөлээх тренерэ Анатолий Афанасьевка эрчиллибитэ. Оскуоланы бүтэрэн баран, спортка үрдүк ситиһиилэнэн, Москуба куоракка «КИТЭК» профессиональнай кулуупка Арассыыйа үтүөлээх тренерэ Марк Мельтцергэ эрчиллибитэ. Инньэ гынан, бу кулуупка биһиги үс кыыспыт Оксана Васильева-Гюрза, Мария Кривошапкина уонна Лидия Андреева бааллара. Кинилэр мантан кынат үүннэрэн үрдүк таһымҥа тахсан, кыайыы өрөгөйүн билбиттэрэ. Мусуой аһыллыытыгар элбэх киһи муһунна. Олор истэригэр А.И.Иванов аатынан олимпийскай эрэллэри бэлэмниир оҕо анал спорт оскуолатын иитиллээччилэрэ кытыннылар. Киирии тылы улуус баһылыгын эбээһинэһин толорооччу Николай Егоров, «Сунтаар нэһилиэгэ» МТ дьаһалтатын кылаабынай исписэлииһэ Зинаида Иванова, улуустааҕы үөрэҕирии салаатын начаалынньыга Гаврил Еремеев, спорт салаатын салайааччы Семен Павлов, култуура уонна духуобунай сайдыы салаатын начаалынньыгын солбуйааччы Изабелла Жиркова, Лидия учуутала Татьяна Божедонова уо.д.а. тыл эттилэр, Лидия туһунан истиҥник-иһирэхтик аҕыннылар. Мусуой дьиэ биир хоһун ылбыт. Онно көрөөччүлэр болҕомтолоругар Лидия Андреева мэтээллэрэ, дастабырыанньалара, кубоктара, киирсибит бэрчээккэтэ бааллар. Биир интэриэһинэй экспонатынан истиэнэҕэ ыйаммыт Аан дойду каартата буолар. Онно кини күрэхтэспит куораттарыгар кыһыл былаахтар анньыллыбыттар. Барыта 30 былаах. Ити курдук, биһиги Лидабыт бэйэтин кылгас олоҕор үгүс дойдуга сылдьан дойдутун, өрөспүүбүлүкэтин, улууһун чиэһин көмүскээн Арассыыйа, өрөспүүбүлүкэ спордун историятыгар бэйэтин аатын киллэрдэҕэ.
