«Сиэннэрбэр уунабын» кинигэ сүрэхтэннэ
Сунтаардааҕы санаторий-интэринээт оскуолаҕа учууталларга, иитээччилэргэ аналлаах сэминээр буолла. Сэминээргэ эбии үөрэхтээһин туһунан лиэксийэлэр, иитэргэ-үөрэтэргэ саҥа ньымалар тустарынан кэпсэттилэр, маастар-кылаастар ыытылыннылар. Маны сэргэ, оскуола оҕолоро оҥорбут оҥоһуктарын быыстапката болҕомтону тарта. «Сиэннэрбэр уунабын» диэн кинигэтэ сүрэхтэннэ. Бу күн биир ураты сэргэх тэрээһининэн СӨ үөрэҕирии туйгуна, оҕо литературатыгар Туйаарыскай аатынан куонкурус лауреата, учуутал Валерий Михайлов-Алып Чаҕаан «Сиэннэрбэр уунабын» диэн кинигэтэ сүрэхтэниитэ буолла. «Өр сылларга алын кылаас оҕолорун үөрэппит буолан, кинилэр тугу сэргииллэрин, тугу толкуйдуулларын кытары билэр курдукпун. Маҥнайгы кылаастары өр үөрэппитим. Дьэ онно эрэй бөҕөнү көрөн, бэйэм ону-маны айар буолбутум. Холобур, кырачааннарга дьикти, интэриэһинэй остуоруйа кэпсээтэххинэ, сырса сылдьар буолаллар эбит», – диэн Валерий Михайлов кэлбит ыалдьыттарга кэпсээтэ. Кинигэни тиһэн таһаарарга улуустааҕы үөрэҕирии управлениетын сүрүннүүр исписэлииһэ М.И.Попова сүүрбүт-көппүт. Манна ааптар суруйбут үөрэ-дьүөрэ дорҕоонноох олук хоһоонноро, ахсаан чабырҕахтара, шарадалар, тэттик хоһоонноро киирбиттэр. Ыалдьыттар төрөппүттэр, учууталлар, иитээччилэр хоһооннору оҕо тылын-өһүн сайыннарарга туһаныахтарын сөп диэн сыаналаатылар. Валерий Егорович хоһоон, чабырҕах, таабырын суруйарын сэргэ, ырыа тылларын эмиэ суруйар. Ол курдук, кини «Туллукчаан» оҕо саадыгар гимн тылын суруйбутугар, М.Ф. Архипова матыыптаабыт. Валерий Егорович «Мозаика» ансаамбылга эмиэ «Светофор», «Чохчоохой» ырыалар тылларын суруйан бэлэхтээбит. Олоҕун 45 сылын оҕо туһугар анаабыт учууталга улуус дьаһалтата «Сунтаар улууһугар үөрэҕирии сайдыытыгар сүдү кылаатын иһин» диэн ытык бэлиэни туттарда. Онтон Валерий Егорович инникитин өссө да айар-тутар, оҕо туһугар үлэлиир баҕалааҕын иһитиннэрдэ. Онон аны аҕыйах сылынан оскуолаҕа киириэн иннинээҕи саастаах уонна алын кылаас оҕолоругар тылы сайыннарарга сөптөөх халыҥ тастаах саҥа кинигэни күүтэбит диэн мустубут ыалдьыттар бары үөрэн, киэн туттан эттилэр.
