Дойдулаахпыт Владислав Коротовы кытта истиҥ көрсүһүү буолла 

Дойдулаахпыт Владислав Коротовы кытта истиҥ көрсүһүү буолла
Фото: ЯСИА.RU
Соторутааҕыта Сунтаар киин бибилэтиэкэтин ааҕар саалатыгар биир дойдулаахпыт, спортивнай суруналыыс, элбэх кинигэ ааптара, эрэдээктэрэ, Баһылай Манчаары аатынан өрөспүүбүлүкэтээҕи төрүт көрүҥнэр киинин медиа салаатын салайааччы Владислав Петрович Коротовы кытта истиҥ көрсүһүү буолла. Ааҕар саала сэбиэдиссэйэ ыалдьыт олоҕун, үлэтин кэрчиктэрин туһунан билиһиннэрдэ. «Журналист, автор, составитель, редактор — Владислав Петрович Коротов» диэн кинигэ быыстапката болҕомтону тарта.
Мустубут дьоҥҥо Владислав Петрович кинигэлэрин билиһиннэрдэ. 40-тан тахса кинигэ ааптара, 27 кинигэ эрэдээктэрэ билигин даҕаны хас да кинигэҕэ үлэлэһэ сылдьарын кэпсээтэ. Дьокуускайга араас уопсастыбаннай үлэнэн дьарыгырарын туһунан сырдатта. Маны сэргэ, араас спортивнай күрэхтэһиилэри сырдаппытын, көрбүтүн, кыттыбытын туоһулуур бейджиктэрин, араас дойдулар харчыларын быыстапкалаан, кэлбит дьону сіөхтөрдө, сэргэхситтэ. Бу күн Тойбохойтон, Элгээйиттэн, Сунтаартан нумизматтар анаан-минээн мустан, биир интэриэстээхтэрин кытта атах тэпсэн олорон дуоһуйа сэһэргэһэн, санааларын үллэстэн, өссө бэйэлэрин баҕаларынан коллекцияларыттан атастаһан, хаҥатынан туохтааҕар да ордук үөрдүлэр, астыннылар.
Түмүккэ Владислав Петрович киин бибилэтиэкэ кэллэктиибэ истиҥ көрсүһүүнү тэрийбитигэр махтанна, бэйэтин кинигэлэрин бэлэх уунна.
Истиҥ тэрээһинтэн астынан туран, Сунтаар улууһун култууратын уонна духуобунай сайдыытын управлениетыттан Изабелла Жиркова, киин бибилэтиэкэттэн кэллэктиип ыҥырыылаах күндү ыалдьыппытыгар махтал тылларын, баҕа санааларын этэн туран, ытыс тыаһыгар арыаллатан эмиэ сэмэй бэлэхтэрин туттардылар.
Видео дня. Лучшие сейвы 18-го тура Английской Премьер-лиги
Комментарии
Читайте также
Новости партнеров
Больше видео