Табалаахха волейболлаатылар уонна сыл бастыҥнарын чиэстээтилэр

Дьааҥы улууһугар Табалаах нэһилиэгин кубогын иһин волейболга аһаҕас турнир ыытылынна. Күрэхтэһиигэ улуус нэһилиэктэриттэн уонна Дьааҥы куоратыттан хас да хамаанда күөн көрүстэ. Дьахталларга сэттэ хамаанда кыттыбытыттан, табалаахтар бастакы хамаандалара эрэллээхтик инники күөҥҥэ түһэн бастаата. Иккискэ Адыаччы нэһилиэгин 1-кы хамаандата таҕыста, үһүс бириистээх миэстэни баатаҕайдар хамаандалара ылла. Эр дьоҥҥо барыта тоҕус хамаанда кубок иһин күрэхтэстэ. Илин-кэлин түсүһүүлээх сытыы киирсии кэнниттэн, I миэстэҕэ Табалаах 1-кы хамаандата тахсан кыайыы өрөгөйүн биллэ. Баатаҕай спортсменнара иккис буолан үөрдүлэр. Үһүс бириистээх миэстэҕэ Верхоянскай куорат хамаандата таҕыста. Маны таһынан, Табалаахха «Сыл бастыҥ дьоно» диэн бэстибээл ыытыллынна. Сыл түмүгүнэн, араас эйгэҕэ үлэлиир бастыҥ көрдөрүүлээх дьону чиэстээн, анал ааттар олохтоннулар. «Сыл бастыҥ учуутала» — Дмитрий Эверстов, «Сыл бастыҥ иитээччитэ – Наталья Атласова, «Сыл бастыҥ дьиэ кэргэнэ» — Христина уонна Дмитрий Стручковтар дьиэ кэргэттэрэ, «Медицина эйгэтин бастыҥ үлэһитэ» — Матрена Атласова, «Култуура бастыҥ пропагандиһа» — Зоя Потапова, «Духуобунас бастыҥ пропагандиһа» — Елизавета Рожина, «Сыл бастыҥ тренерэ» — Николай Потапов, «Сыл бастыҥ спортсмена» — Петр Прудецкай, «Бастыҥ социальнай үлэһит» — Татьяна Юмшанова, «Сыл бастыҥ уопсастыбаннай тэрилтэтэ» — «Илгэ» уопсастыбаннай тэрилтэ (сал. С.Борисова), «Тыа хаһаайыстыбатын эйгэтигэр бастыҥ үлэһит» — Сергей Слепцов, «Сыл бастыҥ предпринимателэ» — Варвара Эверстова буолан бар дьон эҕэрдэлэрин туттулар. Спорка, үөрэххэ ситиһиилэрин, араас тэрээһиннэргэ көхтөөх кыттыыларын иһин, оскуола үөрэнээччилэригэр — Сайыына Слепцоваҕа, Роман Слепцовка, Анисья Баишеваҕа, Ирина Эверстоваҕа, Анна Новгородоваҕа, Святослав Божедоновка баһылык анал стипендиялара туттарылыннылар.