«Махтанабыт эйиэхэ, тыа сирин туруу үлэһитэ»
Ааспыт нэдиэлэҕэ Сунтаар улууһугар биллэриллибит Тыа сирин үлэһиттэрин сылынан уонна «Тойбохой» сопхуос төрүттэммитэ 50 сылын туолар үбүлүөйдээх күнүнэн «Махтанабыт эйиэхэ, тыа сирин туруу үлэһитэ» диэн бэртээхэй тэрээһин буолла. Бу үөрүүлээх дьоро күн хас да түһүмэҕинэн Тойбохойдооҕу алын сүһүөх оскуолатыгар уонна оҕо киинин спорт саалатыгар бэрт ньиргиэрдээхтик ыытылынна. Сунтаартан, «Тойбохой» сопхуос отделениелара үлэлээн олорбут нэһилиэктэриттэн кэлбит ыалдьыттары саҥыйахтаах алаадьынан, уохтаах кымыһынан күндүлээн үөрүүлээх тэрээһини астылар. Тойбохой нэһилиэгин баһылыга Станислав Егоров, улуус баһылыгын экономическай сайдыыга уонна стратегическай былааннааһыҥҥа солбуйааччы Максим Прокопьев, тыа хаһаайыстыбатын управлениетын начаалынньыга Иван Тихонов мустубут дьону бу күүтүүлээх күнүнэн эҕэрдэлээтилэр. Салгыы «Тойбохой» сопхуос бэтэрээннэрэ – Тойбохойтон Модест Петров, Бүлүүчээнтэн Нина Подрясова, Маар Күөлтэн Тамара Попова, Кириэстээхтэн Михаил Коколов үлэлээн ааспыт кэрэ кэмнэрин ахтан-санаан аастылар, үбүлүөй туһунан санааларын эттилэр. «Тойбохой» сопхуос төрүттэммитэ 50 сыллаах үбүлүөйүн үөрүүлээх аһыы кэнниттэн, «Бастыҥ буҕаалтыр-2017» куустатааҕы күрэс буолла. Күрэхтэһиигэ Тойбохой нэһилиэгин дьаһалтатын буҕаалтыра Мария Гоголева, «Тойбохой» сопхуоска өр сылларга үлэлээн ааспыт «Хочо» МУТ буҕаалтыра Светлана Контогорова, Кириэстээх орто оскуолатыттан Ольга Усова, Дьаархан оҕо саадын буҕаалтыра Айна Николаева, Аллыҥа оҕо саадыттан Елена Антонова кытыннылар. Бэйэни билиһиннэрии кэнниттэн «Бухгалтерия знатога» интерактивнай викторина ыытылынна. Салгыы кумааҕы харчыны ааҕыы, мас суотунан суоттааһын, о.д.а. күрэхтэһии ыытыллан, ким талбыт идэтин ордук баһылаабытын көрдөрдүлэр. Күрэс түмүгүнэн III миэстэҕэ Елена Антонова тахсан үөрдэ, иккискэ Айна Николаева тиксэн бииргэ үлэлиир дьонун эҕэрдэтин тутта. Онтон Светлана Контогорова «Бастыҥ буҕаалтыр» ааты ылын үөрүү-көтүү көтөллөннө. Киниэхэ «Тойбохой» сопхуоска 40-ча сыл буҕаалтырдаабыт Никитина Мария Дмитриевна оҕолоро ийэлэрин аатынан олохтообут бириистэрин дохсун ытыс тыаһыгар арыаллатан туттардылар. Эбиэттэн киэһэ тыа хаһаайыстыбатынан дьарыктанааччылар «төгүрүк остуол» тула олорон кэпсэттилэр. Хочо нэһилиэктэрин хаһаайыстыбалара уонна Күндэйэттэн «Сырдык Аартык» ПК үлэлэрин билиһиннэрдилэр. Максим Прокопьев, тыа хаһаайыстыбатын управлениетын үлэһиттэрэ ыйытыыларга хоруйдаабыттара, хаһаайыстыбалар үлэлэрин туһунан кэпсээбиттэрэ элбэх сонуну, үөрүйэҕи биэрэн дьон-сэргэ улаханнык астынна. Бэлиэ даатаҕа анаммыт бастакы тэрээһинин ырыа-тойук аргыстаах кэнсиэринэн түмүктээтилэр. Тойбохой, Уһун Күөл, Бүлүүчээн ырыаһыттара кэрэ куоластарынан, дууһа иэйэр ырыатынан бар дьоннорун эҕэрдэлээтилэр. Үөрүүлээх күн Дьаархан нэһилиэгин баһылыга Алексей Седалищев сыанаҕа тахсан ыллаабыта дьон кэрэхсэбилин ылла. Көрөөччүлэр нэһилиэктэр аҕа баһылыктара сыанаҕа маннык тахсаллара сүргэни көтөҕөрүн бэлиэтээтилэр. 1 из 8
