Дьокуускайга Нам улууһун күннэрэ ыытылынна
Өрөспүүбүлүкэбит киинигэр, Дьокуускайга, үгэс быһыытынан ыытыллар «Нам улууһун күннэрэ» тэрээһин буолан ааста. Бастакы күҥҥэ СӨ ТХМ актовай саалатыгар улуус бэрэстэбиитэллэрэ тыа хаһаайыстыбатын миниистирин солбуйааччы Николай Петрову, урбаан уонна инвестиционнай сайдыы миниистирин солбуйааччы Александр Андросовы, СӨ баһылыгын администрациятын бырайыактааһыҥҥа управлениетын департаменын салайааччы Роман Солодухины кытта көрсөн тыа хаһаайыстыбатын уонна урбааны сайыннарыы боппуруостарын тула кэпсэттилэр. Улуус баһылыга Александр Атласов, улуус дьокутааттарын сэбиэтин бэрэссэдээтэлэ Иван Попов, Намнааҕы ТХУ начаалынньыга Прокопий Окоемов уонна бизнес-инкубаторы салайааччы Алексей Винокуров улууска ыытыллар үлэ-хамнас, былааннар, бырайыактар тустарынан иһитиннэрдилэр. Улуус баһылыга Александр Атласов СӨ бырабыыталыстыбатын бэрэссэдээтэлин бастакы солбуйааччы, ТХМ миниистирэ Петр Алексеевка «Нам улууһа социальнай-экономическай сайдыытыгар кылаатын иһин» бочуот бэлиэтин, тыа хаһаайыстыбатын миниистирин бастакы солбуйааччы Наталья Дягилеваҕа уонна миниистири солбуйааччы Иван Петровка улуус баһылыгын Махтал суругун туттарда. Нам улууһугар үлэлиир «Бизнес-инкубатор» өрөспүүбүлүкэҕэ бастакы күөҥҥэ сылдьарын бэлиэтээтилэр. «Триумф» спортивнай комплекска СӨ спорка уонна физическэй култуураҕа министиэристибэтин үлэһиттэрин кытта көрсүһүү буолла. Бу тэрээһини спорт миниистирин солбуйааччы Семен Чердонов салайан ыытта. Манна спорду сайыннарыыга сыһыаннаах боппуруостар таарылыннылар. Улуус дьаһалтата уонна спорт министиэристибэтэ түһэрсибит бииргэ үлэлээһин туһунан сөбүлэһиини толорууга кэпсэтии барда. Хайа да өттүттэн быйыл, кэлэр да сылларга бииргэ үлэлиир бигэ санаалаахтарын чиҥэтэн сөбүлэһиини салгыырга илии баттаатылар. Онтон улууспут, нэһилиэктэрбит салайааччылара куорат үрдүк уонна орто анал үөрэхтэрин кыһаларыгар үөрэнэ сылдьар Нам ыччатын кытта «Лидер» диэн ыччат култуурунай киинигэр көрүстүлэр. Манна Александр Атласов, Ил Түмэн иһинэн ыччат парламенын чилиэнэ Афанасий Колесов, СӨ волонтердарын киинин дириэктэрэ Айыллаан Винокуров, Намнааҕы ыччат уонна дьиэ кэргэн политикатын управлениетын начаалынньыга Татьяна Степанова, кылаабынай исписэлиис Юлия Жергина, «Бизнес-инкубатор» дириэктэрэ Алексей Винокуров, Дьокуускайдааҕы «Нам» түмсүү бэрэссэдээтэлэ Гаврил Местников ыччат билиилээх-көрүүлээх, көхтөөх, ситиһиилээх, түмсүүлээх буолуутун ситиһэр суоллар тустарынан иһитиннэриилэри оҥордулар. Улуус баһылыга Александр Атласов уонна Ленскэй нэһилиэк баһылыга Андрей Новгородов соторутааҕыта Италия Торонто куоратыгар ыытыллыбыт саахыматчыттар күрэхтэһиилэригэр кыттан Аан дойду чемпионун аатын ылан кэлбит биир дойдулаахпытыгар, М.К. Аммосов аатынан ХИФУ ФЭИ үһүс кууруһун устудьуонугар Вилена Поповаҕа эҕэрдэ суруктары уонна 25 тыһ., 30 тыһ. суумалаах сертификаттары туттардылар. Салгыы нэһилиэктэр баһылыктара бэйэлэрин бастыҥ ыччаттарыгар Махтал суруктары, бэлэхтэри туттартаатылар. Үтүө тэрээһин иккис күнүгэр улууспут уран тарбахтаахтара «Арчы» дьиэтигэр уонна «Сэргэлээх уоттара» култуура киинигэр элбэх экспонаттаах быыстапкалары тэрийдилэр. Элбэх киһи кэлэн сэргээн көрдө. «Эрэл» ТХПК, улуус нэһилиэктэрин урбаанньыттара бэйэлэрин бородууксуйаларын, ас арааһын астаан аҕалан куорат дьонун күндүлээтилэр, атыы-эргиэн тэрийдилэр. Бу күн улууспут дьаһалтатын үлэһиттэрэ, үөрэх тэрилтэлэрин салайааччылара, нэһилиэктэр баһылыктара СӨ үөрэх министиэристибэтигэр сылдьан, атах тэпсэн олорон, ирэ-хоро кэпсэттилэр. Ол кэмҥэ улууспут, нэһилиэктэрбит сорох салайааччылара куоракка олорор биир дойдулаахтарын кытта көрүстүлэр. Нам улууһун күннэрэ «Сэргэлээх уоттара» культурнай кииҥҥэ М.К. Аммосов төрөөбүтэ 120 сылыгар аналлаах «Айар талаан биһигэ – Эҥсиэли хочото» буолбут киэҥ бырагыраамалаах бэртээхэй, сэргэх кэнсиэринэн түмүктэннэ. Бу тэрээһиҥҥэ элбэх киһи сырытта. Түмүктүүр тэрээһин Нам улууһун Өрөгөй ырыатын «Ньургуһун» хоровой коллектив толоруутунан саҕаланна. Манна мустубут дьону-сэргэни улуус баһылыга Александр Атласов, СӨ Государственнай мунньаҕын (Ил Түмэнин) бэрэссэдээтэлэ Александр Жирков, Ил Түмэн дьокутаата Алексей Еремеев, «Нам» түмсүү бэрэссэдээтэлэ Гаврил Местников, биир дойдулаахтарбыт, Нам улууһун Ытык дьоно Иннокентий Сивцев, Тит Сивцев уонна видео нөҥүө М.К. Аммосов кыыһа Лена Максимовна истиҥник эҕэрдэлээтилэр, улуус дьонугар түмсүүнү, ситиһиини, айымньылаах үлэни, дьолу-соргуну баҕардылар. «Нам» түмсүүнү салайар Гаврил Гаврильевич Италияҕа буолбут Аан дойду 62 судаарыстыбатын саахыматчыттарын күрэхтэһиилэригэр кыайан чемпион аатын ылбыт Вилена Поповаҕа түмсүү бэлэҕин туттарда уонна М.К.Аммосов пуондатыгар куоракка олорор биир дойдулаахтарбыт хомуйбут үптэрин анал урнаҕа укта. Нам дьонун пуонданы хаҥатыыга көхтөөхтүк кыттарбытыгар ыҥырда. Быйылгы «Нам күннэрэ» ыытыллыытыгар элбэх киһи, ыччат санаата кэлэн кыттыбытын, тэрээһин далааһыннаахтык, сэргэхтик ыытыллыбытын, сайдыыны тэтимирдэр, торумнуур араас кэпсэтиилэр барбыттарын, сонун этиилэр киирбиттэрин бэлиэтиэххэ наада. 1 из 17
