Миниистири солбуйааччыны кытта кэскиллээх кэпсэтии ыытылынна

Сунтаарга СӨ спорт миниистирин бастакы солбуйааччы Семен Чердонов кэлэ сырытта. Кинини кытта көрсүһүүгэ кэскиллээх кэпсэтии ыытылынна. Семен Сергеевич, бастатан туран, Алкивиад Иванов аатынан олимпийскай эрэллэри бэлэмниир оҕо анал спортивнай оскуолатын саҥа дириэктэрин, Сунтаардааҕы физкультура уонна спорт отделыгар начаалынньыгынан үлэлии сылдьыбыт Денис Даниловы билиһиннэрдэ. Кини иннинэ манна дириэктэрдээбит Арсен Семенов олимпийскай эрэллэри бэлэмниир оҕо анал спортивнай оскуолаларын управлениеларыгар отдел начаалынньыгынан анаммыт. Ыалдьыттар оскуола кэллэктиибин көрүстүлэр, үлэни-хамнаһы билистилэр, үөрэнээччилэр спордунан дьарыктаныыларын, ситиһиилэрин, туох күрэхтэһиилэр ыытыллалларын билистилэр. Салгыы улуус баһылыгын Анатолий Григорьевы кытары кэпсэтиигэ миниистири солбуйааччы Саха сирин спордун сайдыытыгар икки өттүттэн көмөлөөн, ыкса ылсан үлэлэһэр соруктааҕын эттэ. Николай Тарскай турнирын Сунтаарга ыытар туһунан кэпсэттэ. Анатолий Васильевич Семен Сергеевичтэн хардатын, Манчаары оонньууларын инникитин Сунтаарга ыытарга көрдөстө.